Loading color scheme

'T gebruuk van 't Vlamsch

Je gaet hier d'aktyviteiten van 't gebruuk van 't vlaemsch vinden
Vlaemsche lessen, konversaesjen, ...

France 5 en Echappées Belles nae Kwaedyper voor de Vlamsche Taele

Echappées Belles à QuaedypreFrance 5 was den 7sten Oktoober nae Kwaedyper achter de schoole voor de uutzendinge "Echappées Belles" om te filmeeren hoe de jongens kunnen 't Vlamsch leeren klappen. De Fransche televyzje hadde den Rectorat van Rysel evraegd om dat in een schoole te kunnen doen waer dat me 't Vlamsch leeren maer ze en hen geen antoord erkreegen. Ze waeren dervan styf vergaept deurdat 't en is nie azoo in andere streeke. 
Hoe lange gaet dat nog deuren eegen nuuze taele ? 
Maer de jongens hen styf wel eklapt en ezongen en den burgemeëster van Kwaedyper was dervan blyde... en wyder oek. Je gaet dat kunnen zien den 3den van december.

De Vlamsche lessen in 't schoole en mee de associaesjen gaen weerebegunnen

Mee 't nieuw schoolejaer de Vlamsche lessen gaen voorwaert. Je gaet nog een keer veele lessen kunnen vinden.
Lessen mee de associaesjen om de groote menschen : ze gaen egeeven zyn in 17 prochjen, van Duunkerke toet Niepkerke mee 28 lessen elk weeke van den maendag toet den zaeterdag achternoene. 'T zyn oek 9 konversaesjen waer de menschen gaen Vlamsch kunnen klappen.
In 't krutschoole : 'T Vlamsch is eleerd in 4 schoolen van de arrondissement : 3 puublyke schoolen (van den CE2 toet den CM2) en een lyber schoole (van de MS toet den CM2) waer ze kunnen vansichten 't jaer 2007 de streeketaele leeren. Veele inisiaesjen gaen oek egeeven zyn in de krutschoolen van de arrondissement.
In de koleegen : Dit jaer, een lyber koleege gaet Vlamsche lessen geeven an de jonge menschen van de 6de en oek an de 5de.


Om ael te weeten je moet klyken op 
vlamsche lessen 2016-2017

Netwoordenboek : meer of 9000 woorden

Mee de nieuwe versje van nieuwjaermaend 2016 je gaet 604 woorden meer vinden. 
'T zyn nuu 9009 woorden daerin : 4184 Vlamsche woorden (+321) dien verfranscht zyn en 4825 Fransche woorden (+283) dien vervlamscht zyn.
En 't zyn oek 1684 eksplikaesjen (+100), om beeter te verstaen wulk de woorden wullen zeggen, en 145 spreekwoorden of spreekfatsoenen (+9).
Je gaet oek de fonetyke kunnen vinden van alle de nieuwe woorden dien eschreeven zyn.
Klykt maer !

Audiobezoekleëders in 't Vlamsch na den Duunenfoort van Laffernhoek

Audiobezoekleëders in DuunenfoortVrydag, den 24sten van garsmaend, me waeren na Laffernhoek voor d’inauguuraesje van de audiobezoekleëders in ’t Vlamsch van den Duunenfoort. Alle de teksten hen vervlamscht ewist van den voorzitter van de associaesje van de Maets van den Duunenfoort Jean Caenen, oud koster van Vlamsch na Warhem en de audio bezoekleëders hen emaekt ewist van ’t stei van Laffernhoek.

Achter een woord van Edith David, onder-maire van Laffernhoek voor de kuulteure en de patrimoonje, en van Eric Debril, direkteur van de kuulteure, de tourisme en de patrimoonje, me hen een toertje edaen in den foort al de vlamsche teksten hooren. Ze zyn styf te bedanken om dat te beschikt hen. Den Duunenfoort is nuu den tweëden muuzee mee audiobezoekleëders in de streeketaele mee ’T Huus van den Slag na Peene.

'T Westvlamsch in 't schoole : een antoorde dan me en kunnen nie anveerden

Den depuutei Jean-Pierre Decool het eegen den minyster van 't Schoole Najat Vallaud-Belkacem evraegd wulk ze beschikt het voor de verkenninge van 't Westvlamsch in 't schoole. 'T is den Staetsekretaeris André Vallini die antoord het. Klykt hieronder op nhulder naemen om te hooren.
http://videos.assemblee-nationale.fr/video.3518768_5694b7ab45e1f.1ere-seance--questions-orales-sans-debat-12-janvier-2016

Den depuutei Jean-Pierre Allossery het oek eklapt in den Parlement voor 't Westvlamsch om te zeggen dat hen en anveerdt nie 't antoord van de minyster. Klykt oek hieronder op ze naeme.

http://videos.assemblee-nationale.fr/video.3544278_5698037254663.3eme-seance--enseignement-immersif-des-langues-regionales-14-janvier-2016#

Je gaet hier den tekst dan me an de gazetten ezend hen kunnen leezen.
en drie artykels van de gazetten :

Nord : le gouvernement boude (encore et toujours) le flamand

Des députés soucieux de préservation

La ministre dit non au flamand : "incohérence"